ہبہ کا مسئلہ

صاحب شمع محمدی نے ایک حدیث نقل کی ہے۔

عن عبداللہ بن عمرو قال قال رسول اللہﷺ لایرجع احد فی ھبۃ الاالوالد من ولدہ (رواہ النسائی وابن ماجہ۔ مشکوٰۃ کتاب البیوع ص 261 جلد اول)۔

یعنی رسول اللہ ﷺ فرماتے ہیں کوئی شخص کسی کو کوئی چیز ہبہ کر دے بخش دے پھر وہ اسے واپس نہیں لے سکتا۔ سوائے باپ کے کہ وہ اپنی اولاد سے اپنی ہبہ کی ہوئی چیز واپس لے سکتا ہے۔ اسی کے قریب قریب روایت ابوداؤد اور ترمذی میں بھی ہے اور امام ترمذیؒ نے اسے صحیح کہا ہے۔ صحیح بخاری شریف میں فرمان  رسولﷺ ہے کہ اپنی ہبہ کی ہوئی چیز کو لینے والا کتے کی طرح ہے جو قے کر کے چاٹ لیتا ہے۔ یہ حدیث صاف ہے کہ ہبہ کی ہوئی چیز کوئی واپس نہیں لے سکتا۔

اعتراض:

پھر حنفی مذہب پر اعتراض کرتے ہوئے لکھتے ہیں۔

لیکن حنفی مذہب اس حدیث کو نہیں مانا وہ کہتا ہے کہ واپس لے سکتا ہے۔ چنانچہ حنفی مذہب فقہ کی اعلیٰ اور بہترین کتاب ہدایہ کتاب الہبہ ص 273 میں ہے اذاوھب ھبۃ لا جنبی فلہ الرجوع فیھا

یعنی جو شخص کسی غیر شخص کو کوئی چیز ہبہ کرے تو اسے حق ہے کہ اسے واپس لے لے پس حدیث میں تو صاف ہے کہ اپنی ہبہ کی کوئی چیز واپس نہیں لے سکتا۔ اور حنفی مذہب میں صاف ہے کہ اپنی ہبہ کی ہوئی چیز والس لے سکتا ہے۔ حنفی بھائیو! بتلاؤ اب ایمان کس پر ہے؟ اور کفر کس سے ہے؟ کیا حدیث کو مان کر فقہ کو چھوڑو گے ؟ یا فقہ کو مان کر حدیث کو چھوڑو گے؟ (شمع محمدی ص 48، ظفرالمبین ص 207، فتھ المبین علی رد مذاہب المقلدین ص 133، سبیل الرسول ص 278، اختلاف امت کا المیہ ص 59)۔

رضاعت کا مسئلہ

صاحب شمع محمدی نے ایک حدیث نقل کی ہے۔

عن ام الفضل قالت ان النبیﷺ قال لا تحرم الرضاعۃ والرضاعتان۔ (رواہ مسلم۔ مشکوٰۃ ج دوم ص 273)

یعنی رسول اللہ ﷺ فرماتے ہیں کہ ایک یا دو دفعہ منہ لگا کر کسی عورت کا دودھ کوئی بچہ پی لے تو اسے سے حرمت ثابت نہیں ہوتی۔ بلکہ صحیح مسلم کی اور حدیث میں ہے کہ حضورﷺ کی پوری زندگی تک رضاعت یعنی دودھ پلائی کی حرمت کا حکم رہا کہ پانچ مرتبہ پیٹ بھر کر جب کوئی بچہ کسی عورت کا دودھ پئے تو حرمت رضاعت ثابت ہو گی بلکہ یہ بھی مروی ہے کہ پہلے قرآن مین دس دفعہ کا حکم اترا تھا پھر وہ منسوخ ہو کر پانچ مرتبہ کا پیٹ بھر کر پی لینے کا حکم حضورﷺ کی پوری حیات تک باقی رہا۔ پس یہ حدیث صحیح اور صریح ہے کہ دودھ پلائی کی کمی زیادتی میں حکم کا فرق ہے۔

اعتراض:

پھر حنفی مذہب پر اعتراض کرتے ہوئے لکھتی ہیں۔

لیکن حنفی مذہب اس حدیث کو نہیں مانتا۔ اس میں ایک دو دفعہ دودھ پی لینا بھی حرمت ثابت کر دیتا ہے۔ چنانچہ حنفی مذہب کی سب سے اعلیٰ اور سب سے زیادہ معتبر کتاب ہدایہ کتاب الرضاع ص 230 میں ہے قلیل الرضاع وکثیرہ سواء اذا حصل فی مدۃ الرجاع یتعلق بہ التحریم ۔

یعنی تھوڑی رضاعت اور زیادہ برابر ہے دودھ پینے سے بھی حرمت رضاعت ثابت ہو جائے گی۔ حنفی بھائیو! کہا کیا اب تم وہ کہو گے اور مانو گے؟ جو حدیث میں ہے کہ اگر کسی دودھ پیتے بچے نے کسی عورت کی چھاتی سے دو ایک دفعہ دودھ پی لیا تو اس کی ماں کی طرح اس پر حرام نہیں ہوئی جب تک کہ کم سے کم پانچ مرتبہ پیٹ بھر کر اس کا دودھ نہ پی لے۔ حنفی مذہب کی فقہ کے اس مسئلہ کو مانو گے؟ کہ اگر ایک دو دفعہ بھی پی لیا تو بھی حرمت ثابت ہو گئی؟ کہو کس پر ایمان رکھو گے؟ اور کس پر ایمان نہ رکھو گے؟ (شمع محمدی ص 47، ظفر المبین حصہ اول ص 189، فتح المبین علی رد مذاہب المقلدین ص 85 و ص 133)۔

گھوڑے کی حلت کا مسئلہ

صاحب شمع محمدی نے ایک حدیث نقل کی ہے

عن جابر ان رسول ﷺ نهی یوم خیبر عن لحوم الحمر الاھلیۃ  واذن فی لحوم الخيل ( متفق علیہ مشکوۃ صفحہ 359 جلد دوم)

یعنی رسول اللہ ﷺ نے خیبر کے دن پالتو گھریلو گدھوں کے گوشت سے منع فرمایا اور گھوڑوں کے گوشت کھانے کی اجازت دی ۔ ایک صحیح حدیث  میں ہے حضرت اسماء بنت ابی ابی بکر رضی اللہ تعالیٰ عنہا فرماتی ہیں کہ ہم نے رسول اللہ ﷺ کی موجودگی میں گھوڑا ذبح کیا اور اس کا گوشت کھایا ۔ اور روایت میں ہے کہ حضور ﷺ کے سامنے ہم نے گھوڑے کا گوشت کھایا ۔ یہ حدیث علاوہ اعلیٰ درجہ کی صحیح ہونے کے کھلی دلیل صاف لفظوں میں ہے کہ گھوڑا حلال ہے ۔

اعتراض

پھر حنفی مذہب پر اعتراض کرتے ہوئے لکھتے ہیں ۔

 لیکن حنفی مذہب اس حدیث کو نہیں مانتا ۔ حنفیوں کی سب اعلیٰ اور سب سے زیادہ معتبر کتاب ہدایہ کتاب الذبائح صفحہ 425 میں ہے و یکرہ لحم الفرس عند ابی حنیفہ ؒ  ۔ یعنی امام ابو حنیفہ ؒ کے نزدیک گھوڑے کا گوشت مکروہ ہے ۔ حنفی بھائیوں ۔ایک طرف تو آپ کے سامنے حدیث رسول اللہ   صلی اللہ علیہ وسلم ہے اور دوسری طرف آپ کے سامنے آپ کی فقہ کا مسئلہ ہے اب کیا آپ کا جی حدیث کے چھوڑنے اور فقہ کے لینے کو چاہتا ہے ؟؟؟ کیا حدیث سے انکار کرنے اور فقہ پر ایمان لانے کو آپ کا دل پسند کرتا ہے ؟؟ (شمع محمدی ص45 ظفر المبین حصہ اول ص 219 ، فتح المبین علی رد مذاہب المقلدین ص56 و ص 133 )۔

جانور کےپیٹ کے بچے کے ذبیحہ کا مسئلہ

صاحب شمع محمدی نے ایک حدیث نقل کی ہے

عن جابر ان النبی ﷺ قال ذکوۃ الجنین ذکوۃ امہ ( رواہ ابو داؤد والدارمی وراوہ الترمذی عن ابی سعید مشکوۃ صفحہ350 جلد ب)

دارقطنی ۔ ابن ماجہ اور مسند احمد میں بھی یہ حدیث ہے یعنی رسول اللہ ﷺ فرماتے ہیں پیٹ کے اندر کے بچے کا ذبیحہ اس کی ماں کا ذبیحہ ہے یعنی کسی جانور کو ذبح کیا اس کے پیٹ میں سے بچہ نکلا تو وہ بھی اس کی ماں کے ذبیحہ میں ہی داخل ہے اور اس کا کھانا حلال ہے یہ حدیث صاف ہے کہ جس جانور کو ذبح کریں اور اس کے پیٹ میں سے بچہ نکلے اس کا کھانا حلال ہے وہ ذبح شدہ ہے ابوداؤد میں یہ بھی ہے کہ لوگوں نے رسول اللہ ﷺ سے دریافت کیا  کہ ہم کسی مادہ کو ذبح کرتے ہیں اور اس کے پیٹ میں سے بچہ نکلتا ہےتو کیا اسے کھالیں یا پھینک دیں ؟؟آپ نے فرمایا کھالو اس کی ماں کا ذبیحہ اس کا ذبیحہ ہے ۔

اعتراض

پھر حنفی مذہب  پر اعتراض کرتے ہوئے لکھتے ہیں ۔

لیکن حنفی مذہب اس حدیث کو نہیں مانتا ۔ حنفیوں کی سب اعلیٰ اور سب سے زیادہ  معتبر کتاب ہدایہ کتاب الذبائح صفحہ 424 میں ہے ومن نحر ناقۃ او ذبح بقرۃ فوجد فی بطنھا جنینا میتا لم یؤکل اشعر اولم یشعر

یعنی جس نے اونٹنی کو گائے کو ذبح کیا اور اس کے پیٹ سے مرا ہوا بچہ نکلا تو اسے نہ کھایا جائے خواہ ذبح کرنیوالے کو اس کا علم ہو یا نہ ہو ۔ حنفی بھائیوں ،حدیث بھی آپ کے سامنے ہے اور آپ کی فقہ کا مسئلہ بھی آپ کے سامنے ہے ۔کیا سچ مچ جو حدیث میں ہے آپ اسے  نہ مانیں گے ؟؟چھوڑ دیں گے ؟؟ اور جو فقہ میں ہے اسے لے لیں گے ؟؟ اور اسی پر ایمان رکھیں گے ؟؟

(شمع محمدی ص44 ظفر المبین حصہ اول ص 218 ، فتح المبین علی رد مذاہب المقلدین ص56 و ص 133 )

میت کی طرف سے روزے کا مسئلہ

صاحب شمع محمدی نے ایک حدیث نقل کی ہے:

عن عائشہ قالت قال رسول اللہ ﷺ  من مات وعلیہ صوم صام عنہ ولیہ.) متفق علیہ مشکوۃ جلد 1 صفحہ 178(

یعنی رسول اللہ ﷺ فرماتے ہیں جو شخص مرجائے اس کی طرف سے اس کے ولی روزہ رکھ لیں ۔ یعنی کسی کے ذمے کچھ فرض روزے رمضان شریف کے رہ گئے اور اس کا انتقال ہوگیا تو وہ روزے اس کا ولی اس کی طرف سے قضا کرلے ۔ یہ حدیث بخاری مسلم کی ہے علاوہ بالکل صحیح ہونے کے صاف ہے کہ مردے کی طرف سے اس ولی اس کے قضا شدہ روزے رکھ سکتا ہے بلکہ بخاری مسلم میں ہے کہ ایک صحابیہ رضی اللہ عنہا جس کا انتقال ہوگیا تھا آپ نے اس کی لڑکی کو اس کی طرف سے ان روزوں کے رکھنے کا حکم دیا ۔

اعتراض:  پھر  حنفی مذہب  پر اعتراض کرتے ہوئے لکھتے ہیں ۔

لیکن حنفی مذہب اس حدیث کو نہیں مانتا ۔ حنفیوں کی سب اعلیٰ اور سب سے معتبر کتاب ہدایہ کتاب الصوم ص 203 میں ہے ولا یصوم عنہ الولی

یعنی میت کی طرف سے اس کا ولی روزہ نہ رکھے ۔ حنفی بھائیوں ، حدیث بھی آپ کے سامنے ہے اور آپ کی فقہ کا مسئلہ بھی آپ کے سامنے ہے ۔کیا سچ مچ جو حدیث میں ہے آپ اسے چھوڑ دیں گے ؟؟ نہ مانیں گے ؟؟ اور جو فقہ میں ہے اسے تھام لیں گے ؟؟ اور اس پر ایمان لائیں گے ؟ (شمع محمدی ص43 ظفر المبین حصہ اول ص 156 ، فتح المبین علی رد مذاہب المقلدین ص52 و ص 132 ).

خطا و نسیان کا مسئلہ ( نماز میں بھول کر کلام کرلینا )

صاحب شمع محمدی نے ایک حدیث نقل کی ہے

 عن ابن عباس ان رسول اللہ ﷺ قال ان اللہ تجاوز عن امتی الخطاء و النسیان وما استکرھوا علیہ ( رواہ ابن ماجہ و البہیقی ۔ مشکوۃ جلد 2 صفحہ 584

یعنی رسول اللہ ﷺ ہیں  کہ اللہ تبارک و تعالیٰ نے میری امت کی غلطی اور خطا سے اور بھول چوک سے اور جو ان سے جبرا ، کراہا کرایا جائے اس سے درگذر فرماکر معاف فرما دیا ہے یہ حدیث ابن ماجہ اور بہیقی کی ہے اس کے الفاظ صاف ہیں کہ جو کام بھولے چوکے ہوجائے وہ معاف ہے اس پر پکڑ نہیں ۔ اسی اصول کے مطابق نماز میں جو غلطی سے یا بھولے سے بول چال کرلے اس کی نماز باطل نہیں ہوتی ۔چنانچہ صحیح مسلم شریف کی حدیث میں ہے کہ حضرت معاویہ بن حکم رضی اللہ عنہ نے نماز میں کلام کیا لیکن رسول اللہ ﷺ سے یہ منقول نہیں کہ آپ نے انہیں اس نماز کے دہرانے کا حکم دیا ہو ۔

حضرت ابو ہریرہ رضی اللہ عنہ فرماتے ہیں کہ چار رکعت والی نماز میں رسول اللہ ﷺ نے دو پڑھا کر سلام پھیر دیا ۔ پھر جب آپ کو اطلاع دی گئی اور یقین ہوا تو جو دو رکعت چھوٹ گئی تھیں انہیں ادا کرلیا اور دو سجدے سہو کے کر لیے یہ حدیث بخاری ، مسلم مین حضرت ابو ہریرہ رضی اللہ عنہ سے مروی ہے اور یہی روایت مسلم شریف میں حضرت عمران بن حصین رضی اللہ عنہ سے بھی مروی ہے ۔ پس یہ حدیثیں صاف ہیں اس بارے میں کہ نماز میں بھول کر یا بے علمی سے اگر کوئی کلام کرلے تو اس کی نماز باطل نہیں ہوتی ۔

اعتراض

پھر فقہ حنفی پر اعتراض کرتے ہوئے لکھتے ہیں ۔

لیکن حنفی مذہب اس حدیث کو نہیں مانتا ۔ حنفیوں کی سب سے اعلی اور سب سے معتبر کتاب ہدایہ کتاب الصلوۃ باب ما یفسد الصلوۃ الخ ص 114 میں ومن تکلم فی صلوتہ عامدا او ساھیا بطلت صلوتہ

عورت کی باری باندھنے کا مسئلہ

صاحب شمع محمدی نے ایک حدیث نقل کی ہے:

عن ابی قلابہ عن انس قال من السنۃ  اذا  تزوج  الرجل الکبر علی الثیب اقام عندھا سبعا و قسم و اذا  تزوج  الثیب اقام عندھا  ثلثا  ثم قسم قال ابو قلابۃ ولو شئت لقلت ان انسا رفعہ النبی ﷺ ( متفق علیہ مشکوۃ جلد دوم صفحہ 289)

یعنی رسول اللہ ﷺ کی سنت یہی ہے کہ بیوی والا جب اپنا اور نکاح کرے تو اگر کسی کنواری سے کیا ہے تو سات راتیں اس کے پاس گزارنے کے بعد باریاں تقسیم کرے ۔اور اگر کسی رانڈ سے کیا ہے تو تین راتیں اس کے پاس گزار کر پھر باریاں تقسیم کرے ۔ یہ حدیث بخاری و  مسلم کی ہے اور صاف لفظوں میں ہے کسی تشریح کی ضرورت نہیں ۔

اعتراض

پھر فقہ حنفی مذہب پر اعتراض کرتے ہوئے لکھتے ہیں ۔

لیکن حنفی مذہب اس حدیث کو نہیں مانتا ۔ حنفیوں کی سب سے اعلیٰ اور سب سے معتبر کتاب ہدایہ کتاب النکاح باب القسم ص 329 میں والقدیمۃ و الجدیدۃ سواء ۔

یعنی پرانی بیوی اور نئی کی ہوئی باریوں میں برابر کی حقدار ہیں یعنی اگر پرانی پر کی ہے اور وہ کنواری ہے تو سات راتیں اس کے پاس گزار کر پھر باریاں باندھے اور اگر رانڈ ہے تو تین راتوں کا حق اسی کا ہے پھر باریاں باندھے ایسا نہ کرے بلکہ شب اول سے ہی باریاں مقرر کردے ۔ حنفی بھائیوں،  حدیث بھی آپ کے سامنے ہے اور آپ کی فقہ کا مسئلہ بھی آپ کے سامنے ہے ۔ کیا سچ مچ جو حدیث میں ہے آپ چھوڑ دیں گے نہ مانیں گے ؟؟ اور جو فقہ میں ہے اسے تھام لیں گے ؟؟ اور اسی پر ایمان لائیں گے ؟؟

شمع محمدی ص 41 ظفر المبین فی رد مغالطات المقلدین حصہ اول ص 182 فتح المبین علی رد مذاہب المقلدین ص 59